La conseyería d’Educación y’l ayuntamientu de Ribesella proyeuten unifica’l prósimu cursu tola ufierta educativa del Colexu Públicu ‘Manuel Fernández Juncos’. L’alcalde del conceyu, Ramón Canal, presentó una propuesta al conseyeru d’Educación que ye’l trasláu del alunáu d’Infantil dende’l so allugamientu actual al nuevu edificiu pollivalente que se tá costruyendo na villa con fondos del Plan E.
El titular d’Educación, José Luis Iglesias Riopedre, visitó les istalaciones del CP ‘Manuel Fernández Juncos’ acompañáu pol alcalde riosellán y xuntos analizaron la propuesta de xuntanza d’enseñanzes.
El Conseyeru valoró especialmente la iniciativa surxía dende’l Ayuntamientu, que se compromete a ceder parte del nuevu edificiu pollivalente pa usos educativos. “Ye la primera vegada en munchos años que’l ayuntamientu de Ribesella toma la iniciativa, fái obres y propuestes, lo que supón un avance perimportante pa la escuela y pa la escolarización nesti conceyu”, desplicó Riopedre.
“La idega de concentrar na mesma zona tola ufierta d’Infantil y Primaria responde a una vieya reivindicación que beneficiará tanto a les families como a la organización del centru”, dixo. El conseyeru d’Educación comprometió-se col Ayuntamientu a estudiar con detalle la so propuesta y los costes económicos qu’acostina, col oxetu de que la unificación se faiga’l prósimu cursu.