Núñez Feijóo reiterou que “o que quere” o PP é levar a cabo esta reforma antes das galegas e, logo de considerar probado o compromiso do BNG e do PPdeG nesta liña, suxeriu aos nacionalistas que “convenzan” os seus socios de Goberno -en alusión aos socialistas- para que “cumpran a súa palabra”. O voceiro do BNG no Congreso dos Deputados, Francisco Jorquera, coincidiu en que, “se existe vontade política aínda é posible acometer esta reforma”, pero matizou que “é certo que tendo en conta os prazos que establece o regulamento do Congreso dos Deputados existen dificultades obxectivas” para que a proposición de lei órgánica do Parlamento galego e a proposición presentada polo BNG hai dous meses póidanse aprobar antes das próximas eleccións autonómicas. Pola súa banda, o voceiro do grupo parlamentario socialista, Ismael Rego, acusou ao PPdeG, en declaracións a Efe, de realizar un exercicio de “cinismo sen límites” por reclamar a inmediatez da reforma do voto emigrante e dixo que cabe preguntarse polas présas que agora esixe o dirixente dos populares galegos para a reforma do voto emigrante.