Jorquera destacou que «por fin o PSOE sácase a careta e deixa ver ás claras que só aspira a manipular o voto emigrante no canto de preocuparse por outorgarlle as debidas garantías». O deputado do BNG no Congreso puxo de manifesto as contradicións do partido socialista, que «en Galicia di defender a reforma do voto emigrante pero actúa doutro xeito en Madrid, onde bloquea o proceso para modificar canto antes o sistema de voto dos residentes ausentes». O voceiro nacionalista na Cámara Baixa recordou que «foi o BNG quen axilizou o proceso no Congreso para que se constituíse a Subcomisión para estudar a reforma da Lei Electoral», e «é o BNG quen colocou en primeira posición de saída o problema do sistema de voto dos emigrantes nas cuestións a abordar na Subcomisión creada a tal efecto».