Nesti sen, la Direición Xeneral de Pollítica Llingüistica, de la que ye cabezalera Consuelo Vega Díaz, fairá una campaña informativa enos medios de comunicación y enos conceyos nomáos.
Un total de 40 conceyos (la mitá de los qu’hai n’Asturies) finó ya la revisión de los sos topónimos tradicionales y otros 21 entamaren esti procesu impulsáu pola conseyería de Cultura y Turismu col oxetu de recuperar la toponimia popular e incorporar progresivamente los nuevos topónimos oficiales a la señalización vial.
Los topónimos son los nomes que la xente usa pa llamar a los conceyos, a les parroquies, pueblos, llugares, ecetra, de manera qu’estos nomes afayaízos tienen un altu poder identificaor.
Por eso, el Gobiernu del Principáu y los conceyos collaboren conxuntamente pa recuperar y dignificar los topónimos populares y tradicionales, o seya, los nomes de los pueblos, parroquies y llugares, tal y como la xente siempre los utilizó.
Esti procesu apienzó’n mayu de 2004 con la costitución de la Xunta Asesora de Toponimia del Principáu, que dend’entós vién desendolcando un trabayu perintensu de revisión y determinación toponímica, movilizando a espertos en trabayu de campu y collaborando con autoridades municipales y coleutivos vecinales y culturales.
Ye de destacar especialmente l’esfuerzu de collaboración istitucional desendolcáu ente la conseyería de Cultura y los distintos ayuntamientos. La práctica acumulada nesti procesu de diálogu permanente permite dir dando pasos firmes fasta cumplir l’oxetivu caberu: completa’l mapa toponímicu del Principáu nesta primera estaya dedicada a les entidáes de población.